‘सत्यमेव जयते फार्मर कप’ ही महाराष्ट्रातील शेतकरी गटांमध्ये शाश्वत शेतीचे सर्वोत्तम कार्य करण्याची एक स्पर्धा आहे. एकत्रित किंवा गटशेतीच्या माध्यमातून मोठ्या प्रमाणावर शेतकऱ्यांची उपजीविका सुधारणे हे या स्पर्धेचे उद्दिष्ट आहे. 

गटशेतीची स्पर्धा का?

एकटा शेतकरी अनेक संकटांशी लढत असतो. कधी निकृष्ट दर्जाचे बियाणे, कधी दुष्काळ, कधी बाजारभाव कोसळणे.. पावला पावलावर अनेक समस्या भेडसावत असतात. या सर्व संकटांशी लढणे एकट्या शेतकऱ्याला शक्य होत नाही. परंतु जेव्हा एक पीक घेणारे शेतकरी गटाच्या रूपात एकत्र येतात तेव्हा त्यांची एकत्रित ताकद वापरून ते या संकटांचा यशस्वीपणे सामना करू शकतात.  

फार्मर कपच्या माध्यमातून जमीनपातळीवर हजारो शेतकरी गट तयार करून शेती व्यवसाय समृद्ध करण्यासाठी आवश्यक असलेली एक परिसंस्था उभारण्याचा आमचा प्रयत्न आहे. उत्पादन खर्च कमी करत, उत्पादन वाढवत  आपला नफा वाढवण्यासाठी शेतकऱ्यांना प्रोत्साहित करणे हे आमचे उद्दिष्ट्य आहे. हे साध्य करण्यासाठी मदत व्हावी, म्हणून दर आठवड्याला शेतीच्या सर्वोत्तम पद्धतींचे प्रशिक्षण शेतकऱ्यांना दिले जात आहे. १५०० पेक्षा जास्त शेतकरी गट स्पर्धेत सहभागी झाले आहेत. या गटांमध्ये महाराष्ट्रातील ३९ तालुक्यांतील जवळ-जवळ ४०,००० शेतकरी सहभागी आहेत.

स्पर्धेचा कालावधी ३१ जानेवारी, २०२३ पर्यंत आहे. राज्यस्थरीय प्रथम बक्षीस २५ लाख, द्वितीय बक्षीय १५ लाख आणि तृतीय बक्षीय आहे १० लाख रुपये. प्रत्येक तालुक्यात प्रथम येणाऱ्या गटाला १ लाख रुपयांचे बक्षीस आहे.